Um helgina fór Meistaramót BH og RSL fram í Íþróttahúsinu við Strandgötu og var keppt í úrvals, 1. og 2.deild fullorðinna. Flest af besta badmintonfólki landsins tók þátt en mótið er hluti af mótaröð BSÍ og gefur stig á styrkleikalista þess. Rúmlega 90 leikmenn voru skráðir til keppni sem gerir mótið fjölmennasta fullorðinsmótið sem spilað hefur verið á þessu ári á mótaröðinni.
Spilaðir voru fjölmargir spennandi og skemmtilegir leikir um helgina enda til mikils að vinna því heildarverðmæti verðlauna á mótinu sem samstarfsaðilar BH gáfu var um 230 þúsund krónur. Þrír leikmenn náðu þeim frábæra árangri að sigra tvöfalt: Daníel Jóhannesson, TBR, sigraði í einliða- og tvenndarleik í úrvalsdeild, Sigríður Árnadóttir, TBR, sigraði í tvíliða- og tvenndarleik í úrvalsdeild og Stefán Steinar Guðlaugsson, BH, sigraði í tvíliða- og tvenndarleik í 2.deild.
Eftirfarandi BH-ingar unnu til verðlauna á mótinu:
Róbert Ingi Huldarsson, 2.sæti í einliðaleik í úrvalsdeild
Una Hrund Örvar, 2.sæti í tvenndarleik í úrvalsdeild
Rakel Rut Kristjánsdóttir, 1.sæti í einliðaleik í 1.deild
Orri Örn Árnason, 1.sæti í tvíliðaleik í 1.deild
Askur Máni Stefánsson, 2.sæti í tvíliðaleik í 1.deild
Guðmundur Adam Gígja, 2.sæti í tvíliðaleik í 1.deild
Stefán Steinar Guðlaugsson, 1.sæti í tvíliða- og tvenndarleik í 2.deild
Úlfheiður Embla Ásgeirsdóttir, 1.sæti í tvenndarleik í 2.deild
Jón Sverrir Árnason, 1.sæti í tvíliðaleik í 2.deild
Katla Sól Arnarsdóttir, 2.sæti í einliðaleik í 2.deild
Elín Ósk Traustadóttir, 2.sæti í tvíliðaleik í 2.deild
Lena Rut Gígja, 2.sæti í tvíliðaleik í 2.deild
Nánari úrslit má finna hér á tournamentsoftware.com.
Aðeins fimm klukkustundum áður en keppni átti að hefjast var gefin út ný reglugerð um takmörkun á samkomum vegna farsóttar þar sem fram kom að aðeins 50 máttu koma saman. Sem betur fer var hægt að skipta keppendum niður í hólf með sitthvorum inngangi og selernum og því þurfti ekki að aflýsa keppninni. Því miður þurfti þó að banna áhorfendur en bein útsending á Youtube sá um að halda áhugasömum upplýstum.
Þrátt fyrir mikið stress rétt fyrir mót vegna sóttvarnarreglna gekk framkvæmdin mjög vel og fékk félagið mikið hrós fyrir glæsilega umgjörð og gott skipulag. Spilað var á keppnismottum BH sem iðkendur í keppnishópi BH sáu um að setja upp ásamt þjálfurum, glæsileg verðlaun veitt í öllum flokkum, lifandi úrslit á livepoints.net og allir leiki í beinni útsendingu á Youtube rás BH. Það er úrvalsdeildarleikmaðurinn okkar Róbert Ingi Huldarsson sem bjó til úrslitakerfið ásamt félaga sínum Þórði Ágústssyni en hann sá einnig til þess að öllum leikjum var streymt í beinni útsendingu.
Þökkum öllum sem komu að undirbúningi og framkvæmd mótsins kærlega fyrir sitt framlag og leikmönnum fyrir þátttökuna.
Comments